په هالنډ کې د پښتو ورځې لمانځل ،

د پښتو ژبې نړیواله ورځ سږکال د غرغښت او پیوستون ټولنو لخوا په ځانګړو او پراخو فرهنګي او علمي مراسمو سره ولمانځل شوه. په دې مناسبت د هېواد له بېلابېلو سیمو څخه د پښتو ژبې مینه‌وال، لیکوالان، شاعران، څېړونکي او د ټکنالوژۍ متخصصین سره راټول شوي وو. د غونډې موخه د پښتو ژبې ارزښت روښانه کول، د هغې د پرمختګ لپاره لارې چارې لټول او د ډیجیټلي نړۍ له نوښتونو سره د پښتو د یوځای کېدو اهمیت بیانول وو.

په مراسمو کې ګڼ شمېر ښکلي او ارزښتناکې ویناوې وړاندې شوې. ویناوالو د پښتو ژبې د تاریخي شالید، ادبي شتمنۍ او فرهنګي ارزښتونو په اړه خبرې وکړې او ټینګار یې وکړ چې پښتو نه یوازې د میلیونونو خلکو د اړیکو ژبه ده، بلکې د یوه ستر تمدن او فرهنګ استازیتوب هم کوي.

د غونډې یوه مهمه برخه د پښتو ډیجیټلیزیشن ته ځانګړې شوې وه. کارپوهانو څرګنده کړه چې په اوسنۍ ډیجیټلي زمانه کې د ژبو بقا او پرمختګ له ټکنالوژۍ سره مستقیم تړاو لري. د پښتو لپاره د برېښنايي کتابتونونو، ډیجیټلي قاموسونو، معیاري فونټونو، ژباړن پروګرامونو او تعلیمي اپلېکېشنونو د جوړولو اړتیا په ګوته شوه. همدارنګه د پښتو ژبې د محتوا د زیاتولو او د انټرنېټ پر بېلابېلو پلیټفارمونو د هغې د پراخ حضور پر اهمیت ټینګار وشو.

د غونډې په ترڅ کې د مصنوعي ځیرکتیا (Artificial Intelligence) او پښتو ژبې ترمنځ د اړیکو په اړه هم مهم معلومات وړاندې شول.
د غونډې په ترڅ کې د احمد ولي اڅکزي، حنیف رحمان او جانداد جهاني هغه ارزښتناکې هڅې هم وستایل شوې، چې د پښتو ژبې د ډیجیټلي کېدو، له مصنوعي ځیرکتیا سره د نښلولو، د ژبنیو سرچینو د پراختیا، غږیزو او متني ډیټابېسونو د جوړولو او د نړیوالو ټکنالوژیکو پلیټفارمونو پر مخ د پښتو د لا پیاوړي حضور لپاره یې کړې دي، او دوی ته ستاینلیکونه هم ورکړل شول.

په پای کې ګډونوالو د پښتو ژبې د ساتنې، پراختیا او ډیجیټلي پیاوړتیا لپاره د ګډو هڅو پر دوام ټینګار وکړ. هغوی ژمنه وکړه چې د علم، ټکنالوژۍ او فرهنګ په ډګرونو کې به د پښتو د ودې لپاره لا ډېر کار وکړي، ترڅو دا لرغونې او بډایه ژبه د راتلونکو نسلونو لپاره لا پیاوړې او پرمختللې پاتې شي.